AQOONYAHAN AFKIISA KA ARRADAN

Waa jaamici waddamada aqoonta lagu majiirto wax ka soo bartay,waliba waxa uu haystaa shahaadda labaad ee jaamacadda,waxaanu dib ugu ku soo noqday waddankiisii hooyo,halkaasi oo uu ka bilaabay hawlo shaqo.

Maalin isaga oo waddada maraya  ayaa waxa joojiyay oday  magaaladda u yimid arrimo caafimaad.Odaygii waxa uu aqoonyahankii ka codsaday inuu u akhriyo warqad wiil uu dhalay oo dibbadda joogaa usoo diray.

Warqadu waxay ay ku qoran tahay Afsoomaali,waxaanay kawaramaysaa dawooyin wiilku aabihii u soo diray iyo sida loo isticmaalayo dawooyinkaasi.

Aqoonyahankii waxa uu odaygii ku yidhi ”adeer warqadu Somali ayay ku qoran tahay,anna ma akhriyo Somaliga,markaa waad iga raali ahaanaysaa”.Odaygii isaga oo yaaban ayuu ku yidhi’’adeer ma sidayda ayaanad iskuul galin, mutacalin ayaaban ku moodayee?Wiilkii waxa uu yidhi adeer aqoonta shahaadadda labaad ee jaamacadda ayaan haystaa,laakiin Somaliga ma qoro,mana akhriyo,muhiim na maaha inaan bartaa.Mana doonayo.Cajaba Rabbi!

Odaygii oo yaaban ayaa iska lugeeyey,waxa uu haddana u tagay oday ay jaar yihiin,waxaanu ku yidhi horta wiilkaaga sow jaamacadda ma dhigto? Odaygii ayaa ku yidhi mayee wuu dhameeyey,waanu shaqeeyaa hadda,alle mahad ha ka gaadhee.Odaygii socotada ahaa ayaa yidhi haddaa u yeedh warqadan ha ii akhriyee.Wiilkii loo yeedh,warqadiina loo dhiib.Inta uu sidaa u eegay ayuu yidhi”Waa Afsoomaali” isaga oo u sii raaciyay erayo odaygii socotada ahaa aanu fahmin.Odaygii socotada ahaa ayaa yidhi”Afsomaligaa ayaan rabaa inaad ii akhrido adeer.Wiilkii ayaa yidhi “ma akhriyo,mana qoro Afsomaliga adeer”.

Odaygii socotada ahaa waxa uu isweydiiyay haddii aanu mutacalinku dadkiisa waxba u qori Karin,una akhriyi Karin aqoonta uu sheeganayaa micnaha ay leedahay iyo waxa uu bulshadiisa u qaban karo.Waxa uu isweydiiyay wiilkiisa geela raaca iyo wiilkan jaamiciga sheeganayaa waxa ay ku kala duwan yihiin.

Waxa uu isku qanciyay inay dharka quruxda badan ee mutacalinku xidhan yahay is dheer yihiin iyo inay laba degaan oo kala duwan ku kala  nool yihiin.

W/Q: Sacad Maxamed Xasan( Aareeye)