Sooyaalka Faybarka W/Q: Sacad Maxamed Xasan (Aareeye)

Faybarku waa qaab farriimo degdeg ah iyo VoIP¹ oo ku sallaysan internet-ka kaasi oo loogu talagalay tilifoonadda loo yaqaan smartphones.Faybarka waxa sameeyey ama ikhtiraacay shirkadda Viber Media Messages.Waxa kale oo intaa dheer inay isticmaalayaashu isdhaafsan karaan sawiro,muuqaalo iyo cod dhagaysi ah intaba.

Aasaasayaashii Faybarka

Faybarka waxa aasaasay afar nin oo laba yuhuud yihiin labana Beelaruus ,waxaanay kala ahaayeen Talmon Marco iyo Igor Magazinnik oo ahaa saaxiibbo ka wada tirsan ciidamada difaaaca ee Israa’iil iyo Sani Maroli iyo Ofer Smocha oo u dhashay waddanka

Beelaruus.Waxa guddoomiye ka noqday markii Faybarka la daah-furay FaybarkaTalmon Marco oo u dhashay waddanka Israa’iil.

Faybarka waxa lagu daah-furay isticmaalkiisa moobilada iPhone-ka 2dii diisambar ee sannadkii 2010kii ,isaga oo la tartamaya Skype-ka.Qaybtii hore ee Android-ka waxa la siidaayay bishii may ee sannadkii 2011kii,laakiin waxa loogu talagalay 50,000 oo isticmaale ah oo qudha .Faybarka waxa lagu isticmaalay Blackberry-ga iyo Windows Phone-ka 8dii may ee sannadkii 2012kii.Bishii Julaay 24keedii ee isla sannadkaa waxa uu gaadhay Faybarku 90 malyuun oo isticmaale ah. Fariimaha koox-kooxda ah iyo mishiinka codka (Voice mail) ayaa lagu daray Android iyo iphone-ka.Waxa kale oo uu Faybarku ku dhawaaqay in Nookiya Series 40, Symbian iyo Samsung (Bada) lagu isticmaali karo isla  bishii Julaay ee sannadkii 2012kii.

Xarunta Guud ee Faybarka

Faybarku waa kambani ka diwaangashan Laas Feegas (Las Vegas) oo ah magaalo ku taal waddanka maraykanka,waxa kale oo uu xarun ku leeyahay  waddanka Qubrus. Kambaniga waxa laga maamulaa Israa’iil,iyada oo wixii horumarin ahna lagu qabto Beelaruus,si shaqaale jaban loogu helo,waxaanu kambanigu xarumo horumarineed ku leeyahay Israa’iil iyo Beelaruus.

Qaabka Isticmaalka Faybarka

Faybarka waxa laga helaa (diyaar ku yahay) barnaamijka Mac ee ay Apple leedahay,Android-ka Google-ka,Blackberry OS, iOS, Nookiya Series 40, Symbian, Bada (Samsung), Windows Phone iyo Microsoft Windows.Waxa kale oo laga helaa oo uu diyaar ku yahay 64-bit Linux version noocayadiisa Debian iyo Ubuntu.

 Waxaad marka hore u baahan tahay inaad ku shubto mobilkaaga barnaamijka ,dabeeto waad isticmaalaysaa addeegga oo bilaash ah.

 Faybarku waxa uu ku shaqeeyaa Third Generation(3G), Fourth Generation (4G) iyo Wireless Fidelity (Wifi).Faybarka waxa isticmaaala 100 malyuun bishii oo si joogta ah ugu xidhan,waxaase ka diwaangeshan 280 malyuun oo isticmaale ah dhammaan daafaha caalamka.[i]

Marxaladihii  uu Faybarku  soo maray

Markii hore codka la dirayaa waxa uu diyaar ku ahaa iPhone iyo Android oo kaliya,waxaana uu Faybarku ballan qaaday inuu ku dari doono codka Bada (Samsung), Symbian iyo Windows Phone,waxaanu se xusin inuu ku dari doono Nookiya Series 40 iyo Blackberry.Sababta waxa loo aanaynayay Blackberry-ga iyo Nookiya Series 40 oo aan ku shaqaynayn Voice over IP (VoIP)-ga.

Bishii Sebtember 22keedii, sannadkii 2012kii, tilifoonada tayada sare leh (Smartphones) ayaa lagu soo daray in lagu isticmaali karo Windows Phone,laakiin waxa loogu talagalay macaamiisha Nookiya oo kaliya, kadib markii uu heshiis la galay Nookiya, Faybarka waxa lagu isticmaalay dhammaan qalabka windows-ka oo dhan 2dii bishii abriil ee sannadkii 2013kii.

Khatarihii Faybarka soo waajahay:

Bishii Julaay 24keedii sannadkii 2013kii ayaa koox ka tirsan qaybta elektarooniga ee ciidamada  Suuriya u dhaceen nidaamka (System-ka) Faybarka laakiin, sida uu sheegay Faybarku xog muhiim ah oo isticmaalayaasha ah lama dhaawicin.

 Ammaanka Faybarka

Bishii noofambar ee sannadkii 2014kii, Faybarku waxa uu ku guulaystay tijaabo ay ku samaysay Electronic Frontier Foundation oo ah fayaqabka dhanka fariimaha,laakiin waxa uu Faybarku lumiyay tijaabo lagu sameeyey xagga isgaadhsiinta oo aan qarinin (Encrypt) qoraalkaa ama codka.Dhanka kale isticmaalayaashu ma xaqiijin karaan qofka ay la hadlayaan fariimaha, gudbayaana maaha qaar badqabkooda la isku lahayn karo, haddii furaha qarsoodiga (Encryption key²) la xado.Soomaali badan may isticmaaleen Faybarka hadday oggaanlahaayeen in laga maamulo Israa’iil oo ay Yuhuud leedahay barnaamijka Faybarka, inkasta oo ay qaar badan dantooda ka raaci lahaayeen.

Waxa kale oo xusid mudan inaanay Soomaalidu hiddo iyo soo jireen midna u lahayn wax qarinta iyo sirta oo meel kasta oo ay joogaan dunida ay yihiin dad hadal badan, sirtooda inay xafidaana ay ku adag tahay.

Marka loo kuurgalo ammaanka Faybarku maaha mid la isku halayn karo oo u damaanad qaadaya macaamiishiisa inay kalsooni badan ku qabi karaan, waxay se macaamiishu eegayaan oo kaliya addeegga tilifoonka ah ee bilaashka ah  oo ay kaga maarmaan lacagta tilifoonka.

Addeegyadda Cusub ee Faybarka

Addeegyada cusub ee lagu soo daro Faybarku waxay ku kala duwan yihiin noocyadda barnaamijyada iyo tilifoonada,waxaana marka u horaysa addeegga cusub uu soo gaadhaa (hela) iOS iyo Andriod.Faybarka waxa uu kusoo daray addeeg fariimo qoraal ah, sawiro iyo muuqaal dhammaan moobilada.Waxa kale oo diyaar ay ku tahay Faybarka codka tilifoonka wataa (leh)  iPhone,Andriod iyo Microsoft qaybtiisa Windows Phone.Faybarku waxa uu u saamaxayaa macaamiishiisa qayb fariimaha ah,qayb tilifoonadii u dambeeyey ah,qayb liista asxaabta ugu jirta ah, qayb furehayeen ah iyo badhan tilmaamaya waxyaaba kale (more aptions).

Hawl fududayn

 Marka uu ku shubo macmiilku addeegga Faybarka, waxa uu u samaynayaa akoon macmiilka,  isaga oo isticmaalaya lambarka tilifoonka uu isku diwaangeliyo.Macmiilku uma baahna inuu samaysto buug gaar ah oo uu ku kaydsado asxaabta ugu jirta, maadaama  oo uu Faybarku isticmaalayo lambarada ugu jira tilifooonka macmiilka. Noocii u dambeeyey ee Faybarka waxa uu marayaa 2.3 loo yaqaan.

W/Q: Sacad Maxamed Xasan (Aareeye)

Email: aareeye2020@gmail.com

Tix-raac:

·         Cabdiraxman C. Faarax “Barwaaqo” 2007, Hal-bixinta Ereyada Kumbuyuutarka, Canada, Hal-aqoon Publishers.

·         Viber Media S.à r.l. (2014-12-18). "Viber - Android Apps on Google Play". Google Play. Google. Retrieved 2015-04-13.

·         Viber Media, Inc (2015-01-04). "Viber On the App Store on iTunes". App Store. Apple. Retrieved 2015-04-13.

·         Viber Media (2013-11-19). "BlackBerry World - Viber". BlackBerry App World. Research In Motion (RIM). Retrieved 2014-04-20.

·         Viber Media (2015-03-31). "Viber". Windows Phone Marketplace. Retrieved 2014-04-20.

·         "Viber - Frequently asked questions". www.viber.com. Viber Media. Retrieved May 13, 2013.

---

^{1.                  Waa tiknoolaji u u saamaxda (ogolaata) isticmaalayaasha inay ka wici karaan tilifoonka internetka  dhexdiisa}

^{2.                   Waxay u bedeshaa wacaalka afgarad (nidaam xarfo,tirooyin ama calaamado ah oo kumbuyuutarku isticmaalo.}