Faallo Iyo Falanqayn: Maansada Mullaax ee Ibraahim Sheekh Saleebaan (Gadhle) W/Q: Sacad Maxamed Xasan (Aareeye).

Qaybtii 2aad.

Abwaan  Gadhle (AHUN) waxa uu kasii digayay dhibaatada maanta taagan ee ah in kolba koox dan gaar ah leh intay waxogaa u dhiibto odayaal ay odhan doonto muuq-baahiyayaasha iyo wergaysyada ka hadla  oo taageeradiina noo muujiya. Wuxuu yidhi:

Maskaxdaadu yay noqon,

Maqal lagula leeyahay,

Yaan toban muftaax iyo,

Lagu furan masaabiir.

Haddaan tagtada wax laga taransan,timaatidana laga tabaabulshaysan waa lagu tasoobaa. Taariikhda wax baa laga bartaa si jidkii lagu hoobtayna looga fogaado, kii lagu badhaadayna la qaado. Bal u fiirso tuducyadan oo socda.

Waxaad shalayto mudatiyo,

Ma-hadhada xusuusnow,

Halkii qorigu kaa muday,

Mar labaad lugtaadiyo,

Yaan cagtaadu kula marin.

Qofku haddii aanu dantiisa ka adkaan, tu kale kuma dari karo oo waata hore loo yidhi”tiisaba daryeelaa tu kale ku dara”. Tuducyadan abwaanku wuxuu kula dardaarmayaa bulshada inay dantooda raacdaan oo aanay wakhtiga iska lumin. Odoroska iyo faallaynta mustaqbalku waa muhiim oo waa inaad kasii tabaabulshaysataa timmaatidda. Sidan ayuu u cabbiray abwaanku:

Maantiyo dantaadiyo,

Yaan miridhku kaa lumin,

Maalmaha dambeeyiyo

Waxa maqanna faalleee.

Eebbe ummaddiisa haynta isku mid kamuu dhigin oo qaarna waa sabool, in kalana waa maal-qabeenno. Haddaba haddii alle wax ku siiyay waa inaad ka fiirsataa waxaad bixinaysaa halka uu ku baxayo,inay tahay sidii saxda ahayd iyo in kale. Sadaqada na waa inaad bixisaa oo adduunku waa maalmee intaad wax haysto wax kala bax. Berri ayay kaa dhamaan kartaaye.

Maalkaagu yuu noqon,

Mus-dambeedka reerkiyo,

Maqsinkaad u hoyatiyo,

Masallaha Rasuulkiyo,

Ku masaajid lagu gubo.

Moodkiyo adduunkuna,

Waa maax gudhaysee,

Inta aanay kaa madhan,

Ma-hurraan sabooliyo,

Ha ka qadin masaakiin.

Neef muquunadii iyo

Sekadana ha maanicin.

Diinteena islaamka ah ee suubban ayaa inna faraysa inaynu ka fiirsano waxaynu qabanayno oo aan malle-awaal iyo kutidhi-ku-teen lagu go’aan qaadan. Cirdiga iyo sharafka qofka diintu meel adag ayay dhigtay oo waa in la ilaaliyo qofka sharafkiisa. Waa tan faalladiii Ibraahim-Gadhle:

Muhmal laguma guuree,

Maan fayow ha ceebayn,

Ha mar-marin waxaan jirin.

Maamuuska sharaftana,

Ka ilaali meydhaan.

Miyirkiyo hubsiimadu,

Maro weeyi la huwado.

Haddii walaalkaa hantiile yahay, adna sabool tahay waa inaanad ka xumaan ee aad u hambalyaysaa. Haddaad xiqdi iyo xaasid kula kacdo oo aad il gaar ah ku eegto,adna waxba faa’iidi maysid, isagana (walaalkaa) xumaan iyo calool-xumo ayaad kala kulmi.

Murdisiyo walaalkaa,

Hadduu miiq ku dheer yahay,

Yaan masayrku kugu dirin.

Maansadan mullaax iyo maansooyin kale oo Ibraahim Sheekh Saleebaan ba waxaad ka akhrisan kartaa Mullaax: Maansaddii iyo Maalmihii Ibraahim Sheekh Saleebaan ee ay wada qoreen Boobe Yuusuf Ducaale iyo Ibraahim X Muuse Wacays.

Dhamaad.

W/Q: Sacad Maxamed Xasan (Aareeye).

Tix-raac:

Mullaax: Maansaddii iyo Maalmihii Ibraahim Sheekh Saleebaan ee ay wada qoreen 

1. Boobe Yuusuf Ducaale iyo Ibraahim X Muuse Wacays.

2. Bahda Tix-Maal: Muuqaal uu duubtay teleshanka Jabbuuti oo uu Ibraahim Sheekh Saleebaan (Gadhle) kaga waramo maansadda Mullaax.