Faallo Iyo Falanqayn: Maansada Mullax ee Ibraahim Sheekh Saleebaan (Gadhle) W/Q: Sacad Maxamed Xasan (Aareeye).

Maansada Mullaax ee uu tiriyay Ibraahim Sheekh Saleebaan oo Ibraahim-Gadhle lagu naanaysi jiray waa maanso farshanimadeeda aad ku indha-daraandarrayso sida cajiibka ah ee uu abwaanku u sawiray dhamaan adduunka oo dhan.

Waxa uu ku bilaabayaa mahadnaqa alle iyo rasuulkeeniii suubbanaa (nnkh). Tuducaa koobsanaya intaaba ayuu ku furayaa maansada. Sida caadada ah waa ta duco la akhriyo marka hadal la bilaabayo, maansaduna kama duwana oo Ibraahim-Gadhle farshaxanimadiisa iyo afka hodanka uu ku ahaa ayaa u sahashay inuu tuducan ku bilaabo. Haddii aan soo qaadano tuducaa ugu horeeya waxa uu abwaanku yidhi:

Alle mahadnaqiisiyo,

Madxigii rasuulkiyo,

Madal baan ku furayaa,

Maanso gabay mullaaxdeed,

Miiraale roob iyo

Mayay da’ay hillaacii,

Millateri dagaalkii,

Nin mirqaamay dhurankii,

Gabay: Saaxiibtinimada Suldaan

Waa gabay aan u tiriyay kuna maamuusay saaxiibkay Axmed Cilmi Suldaan Seed,  aniga oo ku sifeeyey sida aanu iskugu dheer nahay iyo saaxiibtinimada xeesha dheer ee naga dhaxaysa.Waxaan tilmaamay sida mid ba mid ka kale uu u taageeri jiray ee talo iyo tusaalaba ula garab taagnaa habeen iyo dharaar.

Waxaan ku bilaabay:

1.     Saaxiibtinimada Suldaan waa mid aan salguurayne

2.     Sir weey dahsoonoo waa xaajo aan la saafayne

3.     Saadaal ruuxa ku qiimeeyaa waa mid aanu sifaynayne

4.     Sibiq kuma dhalanine waxay ahayd mid soo jireenee

5.     Saakoon cirroobay iyo ilaa sabinimadaydii

6.     Sidig baanu ahayn iyo laba aan la kala soocine

7.     Markuu mid simbiriraxooduu ka kale saacidi jiraye

8.     Taladoo sirgacantayoo misna sinna balaadhnaatay

9.     Sargoynteeduu lahaayoo caaddilku uu siiyee

10.  Samaheeduu la gaar ahaayoo ciddi aanay la sinnayne

11.  Dano kuma sallaysnayn iyo sad aanu kala roonayne

12.  Saadambaad ka heli ee sooryee xaalku ma ahayne

13.  Nafta uun ku sabaalee oo saacadda isku dhaafi

14.  Seeto dheer iyo may ahayn surin aan la dhaafayne

15.    Sir qarsoon iyo may ahayn dantaada uun ku salleeye

16.   Saaxiibtinimo guunnoo waxay ahayd loo sahan tahay!

Waxaan tiriyay aniga (Aareeye) oo jooga Hargeysa taariikhu markay ahayd 20kii Ogosto, sannadkan 2015kii, habeen Khamiis ah. Gabaygan waxay maskaxdu soo maaxatay xasuuso is biirsaday ka dib iyo sida aan u tebay.Saaxiib kay hadda waxa uu degan yahay waddanka Jarmalka.